Uppáhaldstíminn minn er komin enn og aftur.

Eftir jólin þá tekur oft við dimmur og langur tími og oft á tíðum vont veður eins og er búið að vera núna í vetur, þá er gott að hafa eitthvað skemmtilegt um að vera. Ég hef alltaf jafn gaman að þessum tíma eins og þið vitið sem þekkið mig.

Ég hlusta á öll  íslensku lögin sem taka þátt og þökk sé Spotify þá getur maður hlustað hvar sem er og hvenær sem er. Ég er búin að hlusta á lögin svona cirka 100 sinnum (já ég veit ég er klikk) og fylgjast með Rúv snappinu og kynnast þátttakendum.

En þessi blessaða símakosning er ekki alltaf að gera sig því miður og oft verða úrslitin ekki alltaf sanngjörn og ekki endilega besta lagið valið til að fara út fyrir okkar hönd.

Í ár er ég orðin svo þroskuð að ég ætla ekki að vera svekkt yfir því lagi sem fer út, vera bara æðrulaus og segja svo ef að það gengur ekki vel, "ég sagði ykkur þetta" 

Bið ég því alla að taka símana af börnum og unglingum á næstu helgi , því þau kunna ekki að velja þetta sem passar á stóra sviðið úti í Portugal. Ekki viljum við lenda í því aftur að senda óreynt fólk, þó vissulega sé til ungt fólk sem er með stáltaugar, þá er það ekki allra að standast þetta álag.

En lögin sem keppa laugardaginn 3.mars eru:

Our choice

Flytjandi: Ari Ólafsson

Lagahöfundur/textahöfundur: Þórunn Erna Clausen

Mín umfjöllun: Fyrst þegar ég heyrði þetta lag fyrst á Spotify þá vakti það ekkert sérstaklega athygli mína, svo fylgdist ég með Ara á Rúv snappinu og horfði svo á hann syngja lagið og þar með var ég kolfallin fyrir honum. Þvílík útgeislun hjá drengnum, Eurovision aðdáendur hafa líkt honum við Johnny Logan. Hann er rosalegur söngvari og sjarmatröll. Trúi því og vona að hann fari í einvígið.

Kúst og fæjó

Flytjendur:Heimilistónar

Lagahöfundur/textahöfundur: Heimilistónar

Mín umfjöllun: Skemmtilegt og frumlegt atriði með kjellingunum í Heimilistónum, einhverjir hafa grínast með að þær séu mömmur Pollapönkaranna sem við völdum út hér um árið. Sönglega séð er Ólafía Hrönn ekki nógu sterk undir álagi en ég lofa að ég verð ekki brjáluð þó þær fari út en að mínu mati erum við búin með þennan djók pakka.

Battleline

Flytjendur: Fókus hópurinn

Lagahöfundur/textahöfundur: Michael James Down, Primoz Poglajen/ Jonas Gladnikoff, Þórunn Erna Clausen

Mín umfjöllun: Flottur hópur af krökkum úr The Voice Ísland, lagið er gott og grípandi en raddirnar ekki allar jafn sterkar fyrir minn smekk, vona að þau komi sterk inn og í flottari búningum, hef ekki trú á þeim í einvígið.

Í stormi

Flytjandi: Dagur Sigurðsson

Lagahöfundur/textahöfundur: Júlí Heiðar Halldórsson/ Þórunn Erna Clausen

Mín umfjöllun: Þetta lag vinnur mikið á og heillar mann í flutningi, held þetta gæti fangað Evrópu, vona að hann komist í einvígið.

Here for you

Flytjendur: Áttan: Egill Ploder Ottósson og Sonja Valdin

Lagahöfundur/textahöfundur: Egill Ploder Ottósson, Nökkvi Fjalar Orrason

Mín umfjöllun: Vinsælar samfélagsmiðla stjörnur barna og unglinga, vona að einhver grípi í taumana og slökkvi á símum, ef þau standa sig ekki betur en síðast. Treysti ekki á styrk þeirra til að fara á stóra sviðið.

Gold digger

Flytjandi: Aron Hannes Emilsson

Lagahöfundur/textahöfundur: Sveinn Rúnar Sigurðsson,Jóel Ísaksson, Oskar Nyman/ Valgeir Magnússon, Tara Nabavi

Mín umfjöllun: Flottur smellur sem er mjög svipaður og í fyrra hjá höfundi og flytjanda. Mjög flottur strákur sem gæti alveg farið alla leið en hef ekki trú á að það geri stóra hluti. Má alveg fara í einvígið mín vegna.

Lokaorð

Þetta er mín skoðun og þarf hún ekki endilega að endurspegla skoðun þjóðarinnar. Vona að ég særi engan með þessu áliti mínu.

ást og friður.

Ég held með Ara og Degi og megi sá sem stendur sig betur á laugardaginn vinna.

Yfir og út

Blómið sem fer brátt að komast á fastan stað á "nýjum slóðum".

AB

Eurovision/Söngvakeppnis blogg enn á ný og árið er 2016

Heilt ár liðið frá síðasta bloggi 

Uppáhalds dagurinn minn er í dag, laugardagur og tónlistarveislan í hámarki þessa dagana. Alltaf jafn gaman

Hef lesið á samskiptamiðlunum að í ár sé ekkert varið í lögin í söngvakeppninni. Ég get ekki verið sammála því, mjög auðvelt fyrir fólk á bak við tölvuskjá að skjóta svona setningum út á alnetið án ábyrgðar og oft á tíðum án þess að hafa verið að fylgjast með þessu efni með kveikt á athyglinni. Ég ber virðingu fyrir þeim sem senda inn lögin, þeim sem velja lögin, og flytja lögin og öllum þeim sem vinna við undirbúning á svona keppni, það liggur gríðarleg vinna að baki hjá þessu fólki og allir eru að gera sitt besta, og leggja mikla vinnu í þetta. 

Það er mikið af nýju fólki sem hefur verið að syngja í keppninni í ár og er það gaman en við verðum samt að passa að velja fólk með smá reynslu.

Mig langar ekki til að fara á keppnina til að vera í salnum, finnst betra að sjá og heyra í sjónvarpinu.

Finnst lögin í kvöld misjafnlega Eurovision-leg en er nokkuð til í dag sem heitir Eurovision-legt ?, þetta er orðið svo fjölbreytt en gaman að sjá að alltaf gætir einhverra áhrifa frá fyrri keppnum. Ég er líka búin að vera að hlusta á gömul söngvakeppnislög sem hafa verið í undankeppnum og það er broslegt að heyra hvað sum lögin eru mörg með sama stílinn, eins og t.d. Geirmundar sveiflu á tímabili.

Ég er alltaf að reyna að minna sjálfa mig á að þessi keppni snýst ekki lengur um sönghæfileika heldur show, en ég ætla að gefa álit mitt svona beggja blands.

Góða skemmtun öll sem eitt, bæði aðdáendur, flytjendur og höfundar

 Hér er mitt álit:

- 900-9901 Hear them calling

Flytjandi: Greta Salome Stefánsdóttir

Lag: Greta Salome Stefánsdóttir Texti: Greta Salome Stefánsdóttir

Ég tók ekki eftir þessu lagi fyrr en í annarri eða þriðju hlustun og hreifst mjög af því, ofboðslega vel gert hjá Gretu og flott atriði, kannski pínulítið of mikið svart. Vel sungið og flott hvernig hún beitir röddinni í þessu lagi í upptökunum og vona að henni takist eins vel upp í beinni útsendingu. Það er skemmtilegt að heyra áhrif hljómsveitarinnar Of monsters and men í laginu og mér finnst það mjög flottur kafli þar sem blásturshljóðfærin koma. Svo er grafíkin líka mjög flott. Sumir hafa sagt að þetta sé of líkt fyrrum framlögum Svía en það truflar mig ekki. Ég held með þessu lagi og spái því í toppslaginn og verð ánægð ef þetta verður okkar framlag í Svíþjóð.

- 900-9902 I promised you then

Flytjandi: Hjörtur Traustason og Erna Hrönn Ólafsdóttir

Lag og texti: Þórunn Erna Clausen

Dásamleg rokkballaða, þarna er á ferðinni ein besta rokk ballaða á Íslandi, það er X-Factor í þessu lagi sem kemur ekki oft fyrir í söngvakeppninni á Íslandi en oftar í Svíþjóð og Danmörku. Erna Hrönn er örugg og góð í sínum flutningi eins og áður, félagi hennar sjarmatröllið Hjörtur á góða spretti í laginu en ég er aðeins hrædd við hans tóna, mér finnst hann leika sér aðeins of mikið með tónana og í undankeppninni fannst mér upphafs tónarnir hjá honum ekki góðir í sjónvarpsútsendingunni, vonandi er búið að lagfæra þetta fyrir kvöldið. Ég er virkilega hrifin af þessu lagi og textinn hrífur mann með sér, á köflum finnst mér þetta vera stjörnulag eins og lögin hans Bryan Adams (ekki slæmt að vera líkt við hann). Ég veit ekki hvort Evrópa tæki eftir þessu lagi en eins og ég sagði, þá er eitthvað við þetta lag.

– 900-9903  Eye of the storm

Flytjandi: Karlotta Sigurðardóttir

Lag og texti: Kristinn Sigurpáll Sturluson, Ylva Persson og Linda Persson

Töffaralag sem er með flottum takti og með sniði sem ég hef ekki séð áður í þessari keppni. Karlotta er rosalega flott söngkona og gerir þetta virkilega vel, hlakka til að sjá þetta flutt í kvöld. Geri samt ekki ráð fyrir að Karlotta sé tilbúin í stóru keppnina og held að þetta verði ekki okkar framlag í Svíþjóð.

– 900-9904   Ready to break free
Flytjendur: Þórdís Birna Borgarsdóttir og Guðmundur Snorri Sigurðarson.
Lag og texti: Júlí Heiðar Halldórsson, Guðmundur Snorri Sigurðarson

Öðruvísi lag með flottu rappi, lagið er í heild mjög flott og flottur bassi í því. Það er samt eitthvað við sönginn hjá Þórdísi sem truflar mig, þó hún sé flott söngkona finnst mér eins og hún sé ekki með réttu röddina til að syngja á móti rapparanum sem er hörkuflottur, finnst vanta meiri kraft og ákveðni í hana. Held þau séu ekki að fara að vinna þetta nema kannski vegna símakosningar.

– 900-9905    Á ný
Flytjandi: Elísabet Ormslev

Lag og texti: Greta Salome Stefánsdóttir 

Eina lagið í kvöld sem er sungið á Íslensku. Fagmannlegt lag með flottum rythma og dásamlegum tónum. Vissi ekki að þessa stelpa Elísabet Ormslev væri til fyrr en hún kom fram í The Voice þættinum og er hún upprennandi stjarna, Adell okkar íslendinga. Hef ekki mikla trú á að svona rólegt lag nái langt í keppninni því miður.

– 900-9906   Now
Flytjandi: Alda Dís Arnardóttir

Lag og texti:Alma Guðmundsdóttir og James Wong

Veit eiginlega ekki hvað ég á að segja um þetta lag, einlægt og krúttlegt, eflaust góð lagasmíði. Alda Dís er ný stjarna á Íslandi og er mjög góð söngkona, verður gaman að sjá hvernig gengur hjá henni í kvöld, ég yrði alveg sátt ef það fer í keppnina ef vel gengur í kvöld.

Við brenndum okkur á því 2015 að senda unga og óreynda söngkonu í keppnina, veit ekki hvort það var lagið eða söngkonan sem klikkaði í fyrra,  en vonandi sendum við flott lag, atriði og öruggan flytjanda út 2016, svo plís ekki kjósa bara eitthvað, sendum eitthvað sterkt og gott.

Eftir góða hlustun á lögin í gegnum þessi skrif þá er mitt álit að besta lagið er: I promised you then, Flytjandi: Hjörtur Traustason og Erna hrönn Ólafsdóttir Lag og texti: Þórunn Erna Clausen

Og þau lög sem ég vil að berjist um toppinn í kvöld eru: I promised you then, Hear them calling og Now.

Yfir og allt um kring

Takk fyrir að lesa.  

Europæjan

Er virkilega komin febrúar ? Og enn og aftur komin tími á Eurovision/Söngvakeppnis Blogg frá evrópsku garðplöntunni

Skil ekki þennan ótrúlega áhuga hjá mér á söngvakeppnum og þá sérstaklega þegar við Íslendingar veljum okkar framlag til að senda frá okkur og alltaf trúum við því jafn heitt að nú séum við „með etta“ og draumur okkar um sigur sé handan við hornið. Og byggjum við skýjaborgirnar alveg hátt hátt upp sem er bara alltaf jafn gaman.

Maður á alltaf að vera bjartsýnn og vongóður.

Allavega er ég alveg sátt við þessi 6 lög sem keppa á morgun.

Ég lék mér aftur að því að raða nöfnunum á lögunum og bætti bara við orðunum það, að, og með.  Kemur alltaf jafn skemmtilega út.

Ég set enn og aftur hér að neðan mitt álit á lögunum og mína spá sem ég hef rosalega gaman að, vona að þið skemmtið ykkur jafn vel og ég.

Ég er svo meðvirk að mér finnst öll lögin bara svo flott. En mér finnst alltaf eitthvað vanta upp á hjá okkur, við erum ekki með þennan sjarma á flutningi og sviðsframkomu eins og t.d frændur okkar Danir.

Ég verð heima í sófanum annað kvöld og ætla að njóta þess að horfa og hlusta á þessa dásamlegu árlegu skemmtun og óska öllum góðs gengis.

Ég er svo spennt...

Letz go

Þangað til ég dey - 900-9901

flytjendur og höfundar lags og texta - F.U.N.K.

Já, mér finnst þetta mjög töff lag, hef alveg trú á því, en ég held að það komist ekki í topp slaginn.

Amor - 900-9902

höfundur lags og texta Haukur Johnson Flytjandi Ásdís María Viðarsdóttir

Mér fannst þetta drungalegt og skrítið lag í fyrstu skiptin sem ég sá það en það vinnur á og ég held að þarna sé smá brot af þessu sem ég er að tala um að t.d. Danir hafi, vonandi gengur Ásdísi vel á morgun ef  hún klikkar ekki væri ég alveg til í að leyfa þessu lagi að vera okkar framlag en hef ekki trú á að það fái næga kosningu. Svo finnst mér málningin framan í henni ekki nógu smart.

Lífið kviknar á ný – 900-9903

höfundur lags og texta  Karl Olgeir Olgeirsson – Flytjandi  og textahöfundur Sigríður Eyrún Friðriksdóttir

Flott lag og flott leik- og söngkona,  gaman að fá svona nýtt, þetta gæti alveg  gengið en það er eitthvað við textann, mér finnst hann sunginn alltof  hratt og það er eins og hann passi ekki alls staðar jafn vel, gæti alveg trúað að  hann væri flottur á ensku. Held að þetta gæti endað í baráttunni um sigur.

 Von – 900-9904

höfundur lags og texta Jóhann Helgason  – flytjandi Gissur Páll Gissurarson

Skrítið að velja svona söngvara, en laglínan er alveg dásamlega falleg en ég held að við séum ekki að fara að slá í gegn í evrópu með þetta framlag.  Skil ekki alveg af hverju þetta er í úrslitum.  Verð hissa ef það verður með mörg atkvæði.

Eftir eitt lag – 900-9905

Ásta Björg Björgvinsdóttir  höfundur lags og Bergrún Íris Sævarsdóttir – höfundur texta

Flytjandi Greta Mjöll Samúelsdóttir

Þetta lag er eitthvað heillandi, en smá kjánalegt líka, en það er bara sætt, það grípur mann strax og svoleiðis eru lögin sem við erum að leita að. Þetta er eiginlega uppáhalds lagið mitt í keppninni. Hef trú á því.

Enga fordóma – 900-9906

flytjendur og höfundar lags og texta  Pollapönk

Já það er blessuð blíðan.... æ ég veit ekki, er smá hrædd við þetta lag. Er ekki hrifin af pönki og ég held að þetta lag hafi verið samið á 10 mínútum. En textinn er með boðskap sem margir eru hrifnir af og svo eru það pollarnir sem vilja kjósa þá. Sjáum hvað gerist....ef þetta verður okkar framlag þá þið um það. En ég ætla að hætta þessum fordómum.

Njótið lífsins og kvöldsins.

Takk fyrir að lesa.  

Europris 

Ekki líta undan því lífið snýst og ég á líf meðal andanna og til þín er vinátta sem ég syng!

Minn uppáhaldstími er byrjaður, ekki er það Þorrinn sem heillar, heldur er það íslenska tónlistin sem streymir fram til okkar söngvakeppnis aðdáenda.

Það mætti halda að ég sé stillt á Reset á hverju ári þegar veislan byrjar, því alltaf er ég svo vongóð fyrir hönd flestra laganna, höfunda og flytjenda. Misjafnt reyndar hversu vel ég fíla lög og flytjendur.

Ég er mjög ánægð með þessi sjö lög sem keppa um hylli landans á laugardaginn, það er eiginlega eins og ég hafi verið ein í dómnefnd og stillt þessum lögum upp í úrslit, en ég viðurkenni að ég tók ekki þátt í símakosningunni. En það segir bara að ég hef bara ágætlega mikið vit á þessu.

Ég lék mér að því að raða nöfnunum á lögunum í röðinni sem þau koma fyrir og bætti bara við orðunum því, og , sem. Kemur bara skemmtilega út.

Ég set hér að neðan mitt álit á lögunum og mína spá sem ég hef rosalega gaman að, vona að þið þarna úti hafið líka gaman að þessu.

Jæja skellum okkur af stað í fjörið

Ekki líta undan Lag: Sveinn Rúnar Sigurðsson Texti: Ingibjörg Gunnarsdóttir Flytjandi: Magni Ásgeirsson

Ofboðslega flott og kröftug tónlist og fallegur og áhrifamikill  texti. Ég er ekki alveg viss með hvort Magni henti í þessa keppni eins og hann er góður og sérstakur söngvari. Það voru margir sem vildu senda hann í fyrra og þetta gæti alveg skorað hátt af því að hann er vinsæll söngvari. Ég held ég mundi ekki kjósa það, en sjáum hvernig hann stendur sig á laugardaginn

Lífið snýst Lag: Hallgrímur Óskarsson Texti: Hallgrímur Óskarsson og Svavar Knútur Kristinsson Flytjendur: Svavar Knútur og Hreindís Ylfa

Gleði og fegurð er það fyrsta sem mér dettur í hug, þetta lag og flutningurinn hrífur mann með sér, en mér finnst vanta smá kraft og að þau selji þetta til okkar, mér dettur í hug danska lagið frá 2001 með Rollo & King,  Never ever let you go, sem ég elska enn þann dag í dag. Minnir aðeins á gleðina og einlægnina í laginu hans Sjonna 2011.  Þau geta alveg selt mér þetta með aðeins meiri sannfæringu.

Vandað og fallegt er það eina sem mig langar að segja um þetta lag og texta. Eyþór Ingi er svo flottur söngvari og gerir þetta vel, gæti alveg trúað að hann gæti heillað Evrópu, ef hann er nógu reynslumikill, sem ég er ekki alveg viss um. Hann heillar mig. Kæmi ekki á óvart að hann yrði í toppslagnum í Hörpu á laugardaginn.

Meðal andanna Lag: Birgitta Haukdal, Sylvía Haukdal Brynjarsdóttir & Jonas Gladnikoff Texti: Birgitta Haukdal, Sylvía Haukdal... Flytjandi Birgitta Haukdal

Áhrifamesti flutningurinn í undankeppninni að mínu mati, þetta er svo vel uppsett allt og fallegt. Birgitta Haukdal hefur sýnilega þroskast mikið í tónlist á undanförnum árum, mjög vel gert hjá henni. Lagið hljómar samt eitthvað svo kunnuglega, er ekki viss samt hvaða tónar það eru, en kannski er þetta eouroblandan eina sanna ?  Þetta lag er að fara í toppslaginn og er líklegt í að vera á leið til Svíanna í vor.

Flott popplag, og flottir flytjendur, en þetta lag situr einhvern veginn ekki í manni, hugur minn fer alltaf að hugsa um eitthvað annað þegar ég hlusta á það. Hef því miður ekki trú á að þetta sé að fara að gera stóra hluti.

Halli er alltaf svo afslappaður og næs, þetta lag er svo ljúft, hann nær alltaf að hrífa mann með í söguna í textanum. Við ættum kannski að prófa að senda hann í Eurovision og taka Olsen bræður á þetta. En ég hef ekki trú á að þjóðin sé sammála mér í því. . Hef því miður ekki trú á að þetta sé okkar framlag í ár.

Ég syng! Lag: Elíza Newman, Gísli Kristjánsson & Ken Rose Texti: Elíza Newman, Gísli Kristjánsson & Hulda G.... Flytjandi Unnur Eggertsdóttir

Þegar ég heyrði og sá þetta lag fyrst þá festist það við mig, það er rosalega grípandi og Unnur er svo öðruvísi á sviði en aðrir sem ég hef séð hér á Íslandi, þá meina ég það mjög jákvætt, hún er með meðfæddan hæfileika held ég þó hún sé engin ofursöngkona og loksins sér maður hreyfingu á sviðinu. Hef alveg trú á þessu, ég ætla að gefa henni stig ef hún stendur sig vel á laugardaginn og vona ég að hún sé að fara í toppslaginn og  væri flott framlag okkar í Eurovision,

Stutt og laggott: held að toppslagurinn verði á milli Meðal andanna, Ég á líf og Lífið snýst og Ég syng!

Ég er svo heppin að vera á leið í Eldborgarsal Hörpu á laugardagskvöldið og ætla að njóta þess að sjá og heyra stjörnurnar okkar flytja sitt atriði.

Góða skemmtun

Blomst

Dömur mínar og herrar

Ég hef vanalega ritað hér mitt álit á Eurovision og Söngvakeppni sjónvarpsins árlega, en ég náði ekki að pikka þetta inn fyrr en núna,  eftir að ljóst er hverjir fara fyrir Íslands hönd til Þýskalands í ár.

• 

  Aftur heim

• Aftur heim:      Ég hlustaði á lagið um leið og það kom inn á vefinn hjá Rúv og fann strax að það var mjög grípandi og mikil gleði yfir því, það var mjög vel sungið hjá Sjonna sjálfum á upptökunni og líka mjög vel gert hjá Vinum Sjonna Brink, en eins og allir tóku eftir mjög sérstök stemmning. Ég er sátt við að senda þetta lag.

• 

  Ástin mín eina

         Ástin mín eina:     Virkilega fallegt lag og gaman að sjá nýja höfunda  komast svona langt í keppninni, Erna Hrönn gerði þetta mjög vel, gaman að sjá breytinguna á útsetningunni og áherslunum frá upphafsflutningnum, Erna var stórglæsileg á sviðinu í kvöld, svakalega flottur kjóllinn hennar. Þetta var ekki rétta eurovision lagið okkar að mínu mati, en vel gert.

• 

  Ef ég hefði vængi

        Ef ég hefði vængi:       Gaman að sjá Halla Reynis með þetta flotta og grípandi lag, hann er svo flottur laga og textahöfundur, ekki meira um það að segja, hann stóð sig vel. Ég hefði alveg verið til í að senda hann út fyrir Íslands hönd.

• 

  Ég lofa

         Ég lofa:       Fínasta lag hjá Vigni. Jógvan súkkulaðisætur á sviðinu og gerir þetta virkilega vel, en það var eitthvað með bakraddirnar sem mér fannst yfirdrifið. Ekki rétta eurovision lagið í ár.

• 

  Ég trúi á betra líf

         Ég trúi á betra líf:      Kraftmikið lag  frá Hallgrími og greinilega rétti flytjandinn valinn, Magni  var svakalega flottur og  lagið venst virkilega vel og röddin hans nýtur sín alveg í botn. Ég kaus þetta lag og hefði viljað senda það til Þýskalands.

• 

  Eldgos

         Eldgos:         Já það er nú það . Ég var ekki mjög hrifin af þessu lagi fyrst en það var glæsilegt í kvöld og á tímabili þá hefði ég alveg trúað að það kæmist langt, en það voru bara svo margir góðir eða reyndar bara allir, ég er rosalega hrifin af Matta Matt sem söngvara en hefði samt ekki sent þetta lag.

• 

  Nótt

        Nótt:          Jóhanna Guðrún er besta söngkona Íslands en það er ekki þar með sagt að við kjósum hana til að fara aftur. Lagið heillaði mig ekki þó að ég hafi alveg trú á að það verði vinsælt sem popplag, ég var einmitt að hugsa að ef við hefðum valið hana til að fara út aftur þá væri það endurtekning á því þegar Selma fór í annað sinn, það virkar ekki að mínu mati. Lagið ekki rétta eurovision lagið því miður.

Ég hef alltaf jafn gaman að þessari keppni og sit yfirleitt ein á meðan aðrir fjölskyldumeðlimir horfa annars staðar, því það má ekki trufla mig, ég gæti misst af einhverjum tón eða hreyfingu á sviðinu, það er t.d. ekki gaman fyrir mig að fá heimsóknir á þessum kvöldum eða vera stödd annars staðar en heima því þá get ég ekki einbeitt mér nægilega vel að þessu, ég lifi mig inn í þetta og held stundum niðri í mér andanum á meðan ég dáist að þessum hetjum sem þarna koma fram, úff já nú er spennufall og  pása á laugardagskvöldum frá þessu. Ég er spennt að sjá okkar menn í Þýskalandi í vor flytja AFTUR HEIM.

Takk fyrir mig í kvöld.

Söngelska blómið